Hendri Spescha (1928 - 1982)

BEINVEGNI

Nossa pagina ei dedicada a Vus, lecturas e lecturs dall'ovra da Hendri Spescha.

Ella vul accumplenir in desideri che Hendri sez ha exprimiu all'entschatta da siu ciclus da poesias Per tei e per mei: "jeu less tschintschar cun tei, / jeu bramel cuminonza".

Nossa presentaziun ei in invit a Vus per stimular alla sentupada cun in um dil plaid e cun si'ovra scretta. Sin Vossa via tras si'ovra, sia biografia e sia bibliografia vegnis Vus ad entupar ina persuna engaschada, in scribent e poet romontsch alla tscherca da sesez e dalla cuminonza cun ses contemporans. Ina persuna cun fermas ragischs en la tradiziun cristiana da nossa vallada, la Surselva grischuna, e ch'ei aschia staus ed ei aunc oz purtader da plaids che muentan e fan surstar in e scadin, perfin il perscrutader il pli prosaic. Hendri Spescha, ina persuna prompta da far frunt e che ha contribuiu cun anim a la veta da siu temps, el Grischun ed en Svizra.

Vus vegnis a leger texts che han fatg dad el in liricher sursilvan da peisa, - in ver fuolavia dalla poesia romontscha - in um, fideivels al vargau ed aviarts per siu temps, cun egliada critica, mo plein speronza pigl avegnir. Hendri Spescha ha schenghegiau alla plonta dalla litteratura romontscha ils emprems roms dedicai al mund dil luvrer, dils tschocs, dils affons mendus. Cun sias emissiuns sco redactur da radio e televisiun ha el aviert in'orva viers igl art e viers il mund dils artists.

Sper ses agens texts vegnis Vus er'ad anflar cheu commentaris e consideraziuns sur da si'ovra, ord la plema da contemporans impurtonts e cumpetents: Marianna Blöchlinger-Spescha, Iso Camartin, Angel Crespo, Alexi Decurtins, Gion Deplazes, Felix Giger, Arnold Spescha, Claudio Spescha ed auters. Sil plaun litterar ei Hendri Spescha s'exprimius bunamein adina mo per romontsch, siu lungatg mumma. Sco redactur, schurnalist ed oratur ha el denton savens era scret e plidau tudestg. In grond diember da ses texts vegnan presentai cheu en dus lungatgs, cun la menziun - leu nua ch'igl pusseivel - dil num dil translatader/dalla translatadra.

Quella pagina internet ei il fretg d'ina collaboraziun dils frars Flurin-Maria ed Eduard Spescha, responsabels redacziunals, cun Paul Imboden, in nevs, e Ramun Spescha, in dils fegls da Hendri Spescha, domisdus cumpetents en fatgs d'informatica e da presentaziun grafica.

Nus giavischein a Vus, lecturas e lecturs, ina buna ed emperneivla viseta. Tgi che vul rispunder a quei invit cun in agen commentari ni tgi che giavischa informaziuns ulteriuras sa far quei sil cavazzin contact. Il relasch da l'ovra da Hendri Spescha sesanfla egl Archiv litterar svizzer a Berna, nua ch'ins sa consultar ils documents originals.