Poesias

POESIAS INIZIALAS

L'emprema publicaziun da poesias da Hendri Spescha anfl'ins egl Ischi digl onn 1952, annada 38. Cun quei numer ha il redactur, Guglielm Gadola, fatg in grond pass viers novs auturs. Cheu anfl'ins ina novella da Donat Cadruvi (Il socialist de Seglias), ina skizza religiusa d'in numnau Iso (Senza Diu), ina raquintaziun da Leonard Caduff (Dus frars), e duas poesias d'in poet che segna Renatus, quei vul dir: Hendri Spescha. Da lezzas uras er'ei ualti usitau da duvrar pseudonims. Hendri Spescha, cun ses ventgatreis onns e gia engaschaus professiunalmein sco scolast, po haver vuliu mirar, tgei sinzurs che sias poesias vegnien a haver, avon che da s'exponer persunalmein.

L'emprema da quellas duas poesias, Sco in plumin... ei daventada ina sort noda-casa da si'ovra lirica. Igl ei da dir ch'ei dat aunc in'autra versiun da quella poesia. Mirar pli lunsch sut: Autras versiuns.

La secunda, En miu intern..., ha giu in'autra sort, buca bein capeivla. El volum Il giavin dalla siringia eis ella buca publicada, e leu stat en siu plaz la poesia Il fiug..., cun la menziun: Ischi 1952, ch'ei buca gesta. Era en Uss/Jetzt anfl'ins buca quella poesia. Era leu stat Il fiug..., sut igl onn 1952, denton senza la menziun d'ina publicaziun egl Ischi. Pertgei ch'il redactur principal da Il giavin dalla siringia ed Uss/Jetzt, Flurin Spescha, ha preferiu Il fiug... a En miu intern... savein nus buc. (FMS)