Poesias

EN TES MAUNS

Egl Ischi digl onn 1958, annada 44, ha prof. Guglielm Gadola publicau da Hendri Spescha duas ovras: ina novelletta sut il tetel El veva trent'onns, ed il ciclus da poesias En Tes mauns. Quei ciclus da tempra religiusa cumpeglia siat poesias.

Ins sto nudar la fuorma grafica atgna da tschun poesias. Ella tiarza (Ti eis), che secumpona da strofas da treis/quater/treis vers, ei la secunda strofa stuschada in stèl viers il maun dretg. La quarta (Val de larmas) ha treis strofas da quater vers, la secunda denton ha in tut auter ritmus e stat graficamein enamiez. La tschunavla, cun treis strofas, ha la fuorma d'ina crusch, che corrispunda alla tematica: pia unitad da fuorma e cuntegn. La sisavla poesia (Tias vias) ha in text compact en fuorma da quadrat. La davosa (Jeu vi) ha era ina fuorma geometrica: ses vers fuorman in rombus.