Poesias

SINZURS

Igl onn 1958 han ils dus frars Hendri e Matias Spescha publicau ella casa editura Desertina a Mustér in cudischet da 32 paginas cun cuviarta blaua e cul tetel SINZURS, in'ovra diltuttafatg nova el ravugl dalla litteratura romontscha. Perina vev'ins aunc mai viu in cudisch creaus da cuminonza - e sil medem scalem d'originalitad - dad in poet e dad in pictur artist. La presentaziun artistica, ch'era buca semplamein concepida sco illustraziun, veva cheu tuttenina la medema peisa sco il plaid dil poet. Nova era da l'autra vart era la lirica da Hendri Spescha, ton ella fuorma sco ella musica ed el cuntegn. Schar naven la rema, far diever da vers libers, musicals, mo senza mesira regulara, quei era aunc mai vegniu fatg ella poesia romontscha. Dalla vart dil cuntegn er'ins cheu lunsch dalla poesia tradiziunala cun siu "nus" collectiv, patriotica, epica. Il poet deva cheu vau a sentiments persunals, all'evocaziun d'impressiuns dil mument, e nuot scheva sminar tgi che plaidi, tgei "jeu liric" che s'exprimi.

Ils dus auturs han dedicau quell'ovra "A nos amitgs", e Hendri Spescha ha aviert in'orva cun ils dus vers ch'el ha tschentau all'entschatta, dus vers dil poet Aluis Tuor "Ils nibels van en processiun solemna/sco pelegrins che van urond."

Quei cudisch, ch'ins sa buca anflar pli en vendita, cuntegn endisch poesias da natira diversa. L'emprema, Il Segner ei buns, ei da tempra religiusa, las duas davosas, ualti grevas, expriman la vesta che Hendri Spescha veva lu dalla poesia e dall'ovra d'art. Las otg autras dattan per propi quei sentiment d'ina poesia nova e persunala.

Quell'ovra ha anflau bun'accoglientscha, ei vegnida renconuschida cun in premi e ha, sch'ins sa dir quei aschia, fatg da Hendri Spescha ina "vusch" el context dalla poesia romontscha. L'impurtonza ch'il tierm "sinzurs" ha giu e cuntinau a haver en sia lirica san ins eruir els texts da Felix Giger, d'Angel Crespo e da Marianna Blöchlinger.