Poesias

SENDAS

Igl onn 1975, vegn onns suenter Sinzurs e dudisch onns suenter Alla notg compara in cudisch da format 16,8X23,5 cul tetel SENDAS. Ils auturs: Hendri e Matias Spescha.
Sin pagina 3 stat ei scret pli detagliadamein: Dudisch poesias da Hendri Spescha accumpignadas da treis entagls en linol da Matias Spescha.
Alla fin anfl'ins pliras indicaziuns concernent l'ediziun:
Stampa dil text e ligiadira Bündner Tagblatt SA, Cuera / Entagls stampai sin pupi bütten tier E. Schoop SA, Urnäsch. - Dil ciclus SENDAS ein vegni stampai 600 exemplars. Ils exemplars 1-99 ein numerai e signai a maun dils auturs.
Ediziun dils auturs 1975.

Il cudisch ei buca paginaus, ils treis entagls ein en colur. Era la cuviarta porta in entagl da Matias Spescha: sin in funs grisch ina lingia alva.

En connex cun SENDAS dat ei egl Archiv litterar svizzer in ualti grond convolut che cuntegn manuscrets, emprovas, midadas, dil maun da Hendri Spescha, correspondenza, denter auter cun Andri Peer e cun Reto R. Bezzola. El dialog cun Felix Giger, ch'ins anfla sin quella pagina internet, vegn ei dau in bienton sclariment davart quei ciclus da poesias, che stat tenor Felix Giger en grond contrast formal cun Alla notg.