Poesias

PER TEI E PER MEI

Ina pintga trilogia da Hendri Spescha
accumpignada da litografias da Matias Spescha


En ina brev cul datum dils 2 ded uost 1982 annunzia Hendri Spescha a siu frar Matias ch'el vegni a tarmetter ad el en cuort in niev "opus", sias davosas poesias. El indichescha cun prezisiun il tetel, Per tei e per mei, e la structura: in'entrada, El pierti, treis ciclus da tschun poesias mintgin: Pren mei cun tei, Impressiuns fugitivas, Denter nus, in postludium, En carner, ed alla fin Amen. Il project era da publicar quei ella casa editura Desertina. Hendri propona a siu frar da collaborar e di ch'ei fussi bien da prever treis litografias ed ina cuviarta.

Nus savein che Matias ha rispundiu positivamein e ch'ils dus frars ein i ensemen si Mustér per metter sin via quei project. La mort anetga da Hendri Spescha, alla fin d'october, ha interrut quella realisaziun, aschia ch'el sez ha buca saviu tener entamaun quei cudisch, cumparius pér suenter sia mort, igl onn 1983, tier Ediziuns Desertina, Mustér. En in senn savein nus considerar quell'ovra sco siu testament poetic. Igl opus grond ch'el preparava, Pelegrinadi, ha el buca saviu finir.

Iso Camartin, Felix Giger ed auters han commentau quell'ovra dal pugn da vesta da siu cuntegn. Nus lessan aunc accentuar l'impurtonza dalla structura, numnada cheu sura. Ina tala fuorma architecturala ha buc in da ses auters ciclus. Il diember da tschun anfl'ins era en Tschun viarvs ed Alla notg (tschun sonets), cheu denton ei quei diember tschentaus en ina structura pli vasta, pli cumpleta. (FMS)