Poesias

PELEGRINADI

El decuors dils davos tschun onns da sia veta ha Hendri Spescha luvrau stinadamein vi dad in'ovra poetica che vess duiu survegnir ina dimensiun pli gronda ch'ils ciclus realisai tochen lu, in'ovra che vess duiu ver in flad pli liung. Siu plan era da dedicar a mintga meins digl onn ina poesia. Quella tematica han auters poets era gia tractau. Ella dat al poet la caschun da dar fuorma a siu sentiment pertenend il temps che varga e constituescha in rom el qual patratgs, emoziuns, experientschas e dubis san secavegliar libramein.

Quella lavur ei savens vegnid'interrutta tras duers pli urgents, e la mort ha anetgamein tagliau il fil da quell'ovra. Cu Hendri Spescha ei morts, compurtav'il manuscret quater poesias: ina Dedicaziun, per siu futur lectur, cumpogn da viadi, pelegrin sco el sez, ed ils treis emprems meins digl onn.

Pil dieschavel anniversari dalla mort da siu bab ha Flurin Spescha publicau quei fragment en ina broschura ch'el ha presentau a caschun dils Dis da litteratura digl onn 1992 a Domat. Sis onns pli tard ei quei fragment entraus el volum Uss/Jetzt, schibein igl original romontsch sco ina translaziun en tudestg. Publicond oz il text sin quella pagina internet exprimin nus la speronza ch'in lectur attent e passiunau detti in di in commentari da quell'ovra.