Giug auditiv

E TUT QUEI CHE NUS VEIN DE RETSCHEIVER

Duront il temps ch'el ha passentau a Paris, la stad digl onn 1955, ha Hendri Spescha scret in giug auditiv, al qual el ha dau il tetel E tut quei che nus vein de retscheiver. En quel presenta el duas tematicas: quella dalla veta d'ina famiglia che senutrescha buca pli dal puresser, mobein dalla lavur en fabrica, quei ch'era il cass dalla famiglia digl autur sez; ed en secund liug la tematica dalla clamada d'in dils affons per ina veta d'artist, da pictur. Era quei ha Hendri Spescha "viviu", atras la decisiun da siu frar Matias da schar dad in maun siu mistregn e dad ir a Paris per maliar e viver sco artist. L'emprema tematica, che evochescha las difficultads finanzialas da quell'epoca, ei stada ella litteratura romontscha ualti nova. Quei aspect ha Gion Deplazes mess sil palancau en siu text che nus dein sut il cavazzin Sur l'ovra.

Il giug auditiv sto esser vegnius registraus in ni dus onns suenter la redacziun. L'emissiun el radio romontsch ei vegnida dada anno 1960. Ella ha giu ina consequenza nunspetgada. La direcziun dalla Fabrica de ponn Trun ha viu en quei giug in'attacca directa encunter ella sezza e ha perquei renviau d'in'ura sin l'autra il bab da Hendri Spescha, quei ch'ins di en tudestg "fristlos entlassen". Quella decisiun ha provocau la reacziun dall'Uniun da luvrers dalla branscha da textil, d'in maun, e dall'Uniun svizra da scribents (Schweizerischer Schriftstellerverein) da l'auter. Lur intervenziun cumineivla ha giu success, aschia ch'il bab digl autur ha puspei saviu turnar en fabrica ed occupar siu plaz da lavur, en tutta honur. Nus dein en in Dossier certs elements documentars da quels fatgs.