Pareris

DAVART IL LUNGATG

Nus tschentein all'entschatta dalla secziun Pareris texts da Hendri Spescha che pertuccan il lungatg. Quei daventa buca senza raschun. Il lungatg ei staus per el in element, in factur, in scazi ordvart impurtont. El ha mai munchentau d'explorar quei element e da s'exprimer surlunder. Quei metta el en cuminonza cun plirs auters auturs e surtut cun tut in pievel, quel dils Romontschs.

Gia alla fin da siu studi el seminari da scolasts ha el explicau, tgei peisa ch'el deva al lungatg ed a siu diever. Al ligiom denter il lungatg, quel dalla mumma oravontut, ed il svilup e la carschen dalla persunalitad ha Hendri Spescha savens dau ina grond'impurtonza.

Pli tard ha la reflexiun sur dil lungatg survegniu duas direcziuns principalas. Ina ei ligiada vid las differentas incumbensas culturalas ch'el ha surpriu, sco redactur e lu surtut sco secretari dalla Ligia Romontscha. L'autra ei pli persunala ed intima, quella ch'ei ligiada vid sia clamada da poet e scribent. En quei camp ha el adina puspei insistiu silla specificitad dil lungatg da mintga poet e sin la responsabladad da tut quels che fan diever public dil lungatg.