Pareris

DAVART LA LITTERATURA

Senz'esser in prescrutader da professiun sil camp dalla litteratura, ha Hendri Spescha tuttina demussau in grond interess per fatgs litterars. Podà ch'igl impuls per quei interess ei vegnius, silmeins per part, da ses professers Ramun Vieli e Guglielm Gadola. Gia baul, sco redactur dalla Talina, ha el scret sur da poets e scribents, denter auter sur da Sep Mudest Nay e Gian Fontana. El ha collaborau cun anim ellas Novas litteraras, daventadas pli tard Litteratura. El ha persequitau cun grond'attenziun quei chei vegniu publicau da siu temps ella litteratura romontscha.

Igl element principal era per el il lungatg, en tut sias variaziuns, oravontut en sia fuorma poetica. Perquei ha el empruau en plirs texts, per part malaveta fragmentars, da scriver sur dil lungatg liric, sur la translaziun da poesias, sur la critica litterara. Ei po esser bien da comparegliar cun quei ch'el ha scret davart si'atgna producziun poetica.

Quels texts comparan cheu per part per l'emprema ga.