Pareris
DAVART ART ED ARTISTS
Igl art e la lavur dils artists ein stai per Hendri Spescha gia fetg baul zatgei che ha captivau ed interessau el. Nus vein detg en in auter liug, co el ei vegnius gia da buob en contact cun litteratura e poesia. Mo el ei era gia baul vegnius attents ad autras fuormas digl art: il cant, en casa ed en scola; la musica, a Trun e lu, da giuven, duront ils onns dalla scola cantunala, a Domat, en contact cun siu aug Pieder Antoni Willi. Alla pictura eis el s'avischinaus ensemen cun siu frar Matias. Lez ha entschiet baul a dessignar e maliar. Quei ha cudizzau l'entira famiglia da s'informar en caussas da historia d'art e da s'interessar a quei che schabegiava en quei camp el Grischun ed en Svizra.
Igl onn 1955 ei Hendri Spescha ius cun siu frar a Paris, duront la stad, e quei ha dau caschun ad el d'entupar auters artists e da s'iniziar ell'actualitad artistica da gliez temps. Cu Hendri Spescha ha entupau per l'emprema ga Alois Carigiet savein nus buc. Segir eis ei che quel dus umens han anflau spert dariet patratgs e sentiments cumineivels, aschia ch'els ein daventai amitgs e che Hendri Spescha ha persequitau cun grond'attenziun la lavur e las exposiziuns dil pictur da Flutginas.
Il contact cun Matias Spescha ei semantenius tras a tras. Ordlunder ei naschida ina collaboraziun immens fritgeivla. Els han realisau ensemen pliras publicaziuns bibliofilas (Sinzurs, Alla notg, Sendas, Per tei e per mei), e Matias Spescha ha era illustrau plirs cudischs da scola che Hendri Spescha ha publicau, ensemen cun Dorli Rageth, per las scolas dalla Foppa.
Il radio e la televisiun han aviert a Hendri Spescha in camp nua ch'el ha saviu dar vau a siu giavisch da far enconuschents als auditurs e spectaturs artists grischuns en grond diember e da contribuir quelluisa a quei ch'el ha numnau en certas caschuns l'educaziun tier il bi. En la medema direcziun van ils artechels publicai en pliras gasettas sur dad exposiziuns ed eveniments culturals ed artistics. Nossa pagina dat ina rimnada da documents da quella tempra.