Ovra

OVRA LITTERARA

Entruidament

Gl'emprem plaz enteifer l'ovra da Hendri Spescha dein nus senza retenientscha a si'ovra litterara. Quella vart da si'ovra ei meins ligiada cul temps che varga; ella vegn a semantener aunc ditg ed anflar lecturas e lecturs interessai e passiunai.

Hendri Spescha, "um dil plaid", sco el scheva da sesez, ei adina staus pertscharts ch'il lungatg, il plaid, il vierv, ei buca mo in mied social da communicaziun, mobein, aunc dapli, in mied per exprimer il pli intim e scuvierer a sesez ed als auters quei che muenta e "mudregia" (Iso Camartin).

Quei vala en emprema lingia per la poesia, la lirica. Quella ei senza dubi la part che ha la pli gronda peisa enteifer la producziun litterara da Hendri Spescha e pren perquei cheu il pli grond spazi.

Cumparegliau cun quella d'auters auturs romontschs, ei quella da Hendri Spescha en prosa e sil plaun dramatic da dimensiun plitost stretga. Nus dein ella cheu denton, perschuadi che nus essan ch'era ella ha sia valeta e ses merets.

Da grond'impurtonza ei quei che Hendri Spescha ha dau a nus tras ils mieds dil radio e la televisiun. Leu ha el anflau ina via ed ina tribuna che corrispundeva a sia natira.