Auturs plaidan da si'ovra

FELIX GIGER

Denter quellas e quels che han persequitau attentivamein il svilup dall'ovra litterara da Hendri Spescha stuein nus quintar ell'emprema retscha, sper Iso Camartin ed Andri Peer, il linguist e poet Felix Giger. Era tier el savein nus buca precisamein cu lur relaziun persunala e pli e pli amicala ha entschiet. Quei ch'ei segir, gliez ei che quels dus umens dil plaid han anflau in en l'auter ferms sinzurs, in lungatg cumineivel, era sche lur posiziuns davart litteratura e poesia eran per part disviontas.

Hendri Spescha ha legiu cun grond interess la grond'ovra poetica da Felix Giger, Ina sesiun egl uffiern. Zacontas notizias surlunder possedin nus, mo ellas ein malaveta fetg fragmentaras. Tut auter ei la situaziun dalla vart da Felix Giger. El ha dau resun a plirs ciclus da poesias ed al cudisch d'Angel Crespo sur l'ovra poetica da Hendri Spescha. Sco redactur ha el discutau cun Hendri Spescha en plirs numers dalla LITTERATURA, ed el ha suttamess a Hendri Spescha anno 1979 in Questiunari fetg detagliau pertuccond sia lavur da poet. Las rispostas, manuscrettas, da Hendri Spescha han mai contonschiu Felix Giger. Perencunter ha Hendri Spescha surdau a siu amitg l'entschatta fevrer 1980 in grond fasch cun documents pertenend Sendas, in fasch che Felix Giger ha lu pli tard remess a nus per ch'el sappi entrar el Relasch pigl Archiv svizzer da litteratura.

Cun grond'engrazieivladad dein nus cheu sin nossa pagina in ton dalla documentaziun naschida da quella relaziun denter Felix Giger e Hendri Spescha, oravontut il Questiunari. (FMS)