Ovra

PARERIS

Professiunalmein ei Hendri Spescha staus activs en plirs camps, sco scolast, sco cau digl Uffeci regiunal per l'integraziun professiunala d'invalids, sco secretari dalla Ligia Romontscha e finalmein sco redactur dalla Televisiun romontscha. En tut quels camps ha el stuiu far diever dil plaid, dall'expressiun varionta, en contacts individuals e publics.

Mo Hendri Spescha ei era staus ina persuna engaschada, prompta da far frunt e d'exprimer cun anim siu meini en plirs camps dalla veta da siu temps, ton el Grischun sco en Svizra.

Sco «um dil plaid» enconuscheva el la forza dils mieds da communicaziun ed ei s'exprimius tras il plaid oratoric, tras artechels en gasettas e revistas (da lungatg romontsch e tudestg), tras radio e televisiun. El ei staus redactur dalla Talina, dalla Vusch dils mats, dallas Novas litteraras e ha creau ed animau ina gruppa da collaboraturs per preparar il project Revista Romontscha.

Sut il tetel general Pareris comparan cheu documents da natira diversa. Quels documents ein cavegliai en camps tematics: davart lungatg, davart litteratura, davart art ed artists, davart persunalitads da siu temps, davart psicologia ed educaziun e finalmein davart fatgs publics.

Quei che pertegn sias activitads redacziunalas renviein nus al cavazzin Dossiers.