Ovra litterara

POESIAS

Gia da buob ei Hendri Spescha vegnius en contact cun poesias, cun l'expressiun lirica. El enconuscheva persunalmein en siu ambient da famiglia e dil vitg umens che scrivevan e publicavan poesias: Sep Mudest Nay, in da ses augs; Gion Cadieli, Carli Fry, Gion Battesta Sialm, treis prers vivend a Trun. En famiglia vegneva savens tschintschau da poets d'in ton pli baul: Giachen Hasper Muoth, numnaus il prenci-poet, Giachen Michel Nay, Flurin Camathias, Alfuns Tuor, Gian Fontana ed auters plirs. La liturgia catolica, il cant da chors virils e da chors da baselgia, il cantar en scola eran vehichels dalla poesia romontscha.

Pli che biars auters sto Hendri Spescha ver sentiu gia sco affon ch'ei deva leu ina fuorma tut atgna da s'exprimer. El raquent Cu jeu hai piars la cardientscha fa el ina remarca en quei senn ed ins vesa leu, cun tgei anim e tgei forza el stat sil baun e «di si» la poesia da Gion Cadieli «Il claustral da Pisa». Igl ei pia buca da surstar sche Hendri Spescha ha gia da giuven entschiet a scriver ni far poesias, surtut duront ses onns alla scola cantunala. Stauschs ein vegni d'ina vart da siu professer da romontsch, Ramun Vieli, da l'autra vart dalla relaziun cun ina conscolara, Isabella Furrer, che mava lu el gimnasi a Cuera.

Publicamein ein poesias da Hendri Spescha cumparidas tras l'iniziativa da Guglielm Gadola, da lezzas uras – e duront biars onns – redactur digl Ischi. El numer dall'annada 38, da 1952, anflan ins duas poesias, ch'ein cumparidas cun in pseudonim: Renatus. Daven da leu ston ins spetgar plirs onns avon da puspei udir sia vusch lirica: il volum SINZURS ei digl onn 1958. Pli tard ein lu auters ciclus vegni: alla notg, SENDAS, PER TEI E PER MEI . La davosa gronda lavur - PELEGRINADI - in fragment, ei comparida suenter sia mort.

Co Hendri Spescha veseva sez sia lavur da poet liric e co auters, cumpetents en caussa, sco Iso Camartin, Felix Giger, Marianna Blöchlinger-Spescha, Angel Crespo ed auters plirs, han legiu e giudicau sias poesias, san ins anflar cul cavazzin sur l'ovra.